Big Man Abroad

A Pidgin English poem inspired by some Naija boys in London:

I no fit tell you
The things wey I don do
Since I leave there,
To come here
To this land of Oyinbo.

I no fit tell una
The places wey I don waka,
Or the insult wey I don hear
Since I land here
For this land of Oyinbo.

I no fit even try
Tell you how I don cry
When I remember
How Naija dey groove for December
Unlike this land of Oyinbo.

But I no fit complain
Because na me carry myself enter plane
With my fine, fine dress
As I come find progress
For this land of Oyinbo.

In fact, I fit tell you say since I land
For this nonsense England,
My brother don fit finish school
And my people fit chop belle-ful
Becos of money from land of Oyinbo.

I fit even tell you say because of my sweat,
My papa don build big house with inside toilet
And all the people for village
Come dey pay am homage
Because im get son wey be big man for land of Oyinbo.

But I get to hala
My dear sister and brother
Because I don tire
For this my lonely waka
For this land of Oyinbo

I true true wan return home
But I dey fear to come
Because una fit laugh me
When una finally see
Say I really be small man from land of Oyinbo.

by Naijamum